Б.Уянга: Усны гайхамшигт чанарыг зүйрлэх аргагүй

"Aqua fitness" клубын захирал Б.Уянгатай ярилцлаа. Хүүхэд байхаасаа спортоор хичээллэж, ''Хар ирвэс'' клубт фитнесийн багшаар ажиллаж байсан Б.Уянга буюу олны мэдэхээр Ука 2006 онд уг төвөө байгуулжээ. -Усны гайхамшгийг юу гэж тодорхойлох вэ? -Манай төв 2006 онд анх байгуулагдаж байсан. Тэр цагаас хойш олон хүнд усны гайхамшгийг мэдрүүлж, эрүүл, гоо сайхан байхад нь тусалсандаа сэтгэл хангаlуун байдаг. Ус хүний арьсанд үнэхээр сайн нөлөө үзүүлдэг. Энэ бүхнийг манай төвд явсан хүмүүс бүрэн дүүрэн мэдэрдэг гэж хэлж болно. Ялангуяа арьс нь суларсан дундаас дээш насныхан болон төрсөн эмэгтэйчүүд усанд дасгал хийхэд нэн тохиромжтой. Хүйтэн усны даралт их нягт байдаг учраас дасгал хөдөлгөөнтэй хоршин арьсыг чангаруулдаг давуу талтай. Зааланд хөдөлгөөн хийхдээ хүн заавал ямар нэгэн хэрэгсэлтэй хийж байж илүү ачаалал өгч, илүү үр дүнд хүрнэ. Харин усанд дасгал хийх үед усны даралт гадна талаас нөлөөлж, дотор талаасаа булчин ажиллана гэсэн үг. Өөрөөр хэлбэл, тухайн дасгал хийж байгаа хүн ямар нэгэн хэрэгсэлгүйгээр, бас өөртөө хэт их ачаалал өгч ядардаггүйгээрээ давуу талтай. Нөгөө талаар ерөнхийдөө махлаг хүмүүс буцаад турахад целлюлит буюу арьсны гадна талд өөхөн давхарга үүсдэг. Ерөнхийдөө дундаас дээш насныханд целлюлит хуримтлагдах нь элбэг байдаг. Үүнийг усны цохилтоор бас арилгадаг. Хэт жин ихтэй хүмүүс зааланд дасгал хийхэд бэрхшээлтэй байдаг бол усанд эсрэгээрээ. Учир нь усанд хүний биеийн жин хөнгөн болдог учраас дасгал хийхэд илүү хялбар болж өгдөг. Мөн хүйтэн усанд дасгал хийж байгаа учраас хөлс ихээр ялгарахгүй, ядрахгүй, түүртэхгүй байдаг сайн талтай. Хэт их жин ихтэй, төрсөн эхчүүдээс гадна өөрийгөө хөдөлгөөний эвсэлгүй гэж боддог хүмүүс манай төвд явахад нэн тохиромжтой гэж хэлмээр байна. Яагаад гэвэл усан дотор тухайн хүнийг эвсэлтэй хөдөлж байна уу, үгүй юу гэдгийг хэн ч харахгүй учраас санаа зовохгүй дасгалаа хийж чаддаг. -Усанд хийдэг дасгал жирийн фитнес дасгалаас өөр үү? -Ялгаатай. Булчингийн дасгалаас гадна эмэгтэйчүүдийн хувьд илүү өөх суудаг хэсэг болох гарын бугалга, бэлхүүс, гуяны хэсэгт голчлон дасгал хийдэг. Амаржсан эхчүүд төрсний дараах хоёр сартайгаасаа хичээллэхэд тохиромжтой. Дасгалаа тогтмол, эрчимтэй хийснээр сардаа 4-5 кг хасагдаж, сул арьс маш сайн чангарна. Түүнчлэн стресс тайлах, хөөнгө, хаван бууруулахад ус үнэхээр гайхамшигт шидээ өгнө гэж хэлмээр байна. Усанд нэг цаг дасгал хийгээд гарахад бие хөнгөрч, арьс чангарсан нь шууд мэдрэгддэг. Ер нь хүний жин хасагдах тусам арьс суларч, унжиж байдаг учраас хүйтэн усаар чангалж, чийрэгжүүлэх зайлшгүй шаардлагатай. Суларсан арьсны дотор дахин өөхөн давхарга үүсэх магадлал өндөр байдаг. Тэгэхлээр биеэ чийрэгжүүлж, арьсаа чангалах, фитнесээр хичээллэх гэсэн хоёр үйлдлийг нэгэн зэрэг хийж, цаг заваа ч хэмнэж байгаа юм. Дээр нь нэмж хэлэхэд усан дотор дасгал хийхэд бэртэл гэмтэл харьцангуй багатайгаараа бас давуу талтай. Бөөрөнд хэт ачаалал өгөх, зүрх судасны өөрчлөлттэй хүмүүс даралт ихсэх зэрэг сөрөг нөлөө гардаггүй. Тийм учраас найман наснаас наян нас хүртэлх хэн ч усан фитнесээр хичээллэж болно. Сүүлийн үед эмч нар ч бассейнд хичээллэхийг их зөвлөдөг болсон байна лээ. Хөдөлгөөний хэт дутагдалд орсон, нуруу, хүзүүний шохойжилт, үе мөчний суултын улмаас усанд дасгал хийх эмчийн зөвлөгөөтэй хүмүүс манайд явдаг. -Усанд хийх дасгал улирлын чанартай байх уу. Жишээ нь, өвөл хийвэл илүү тохиромжтой гэх ч юм уу? -Улирлын онцлог хамаагүй. Хүн өвөл, зун ялгаагүй байнгын идэвхтэй хөдөлгөөнтэй байх ёстой. Аль ч улиралд усанд хийх дасгал хүний биед хэрэгтэй. Зун бол халууцаж хөлрөх, хөөж хавагнах гээд биед гардаг элдэв өөрчлөлтийг усны тусламжтайгаар зохицуулж болно. Өвлийн улиралд усан спорт, дасгалаар хичээллэдэг хүмүүс илүү чийрэг байдаг гэхчилэн давуу тал их. -Фитнес дасгалын төрлүүд олон янз байдаг. Усан фитнес ч өөр төрлүүдтэй юу? -"Aqua fitness" дотроо олон төрөл байдаг. Дэлхийн бүх л оронд усан фитнес өөр өөрийн онцлогоор хөгжиж байгаа. Манай төвийн хувьд бас л онцлогтой. Монголын хувьд усан бассейн ховор учраас манайх тэр орон зайг тодорхой хэмжээгээр нөхөж байгаа. Анх би энэ төвөө нээхдээ оюуны өмчөөр баталгаажуулж, өөрийн гэсэн хөтөлбөрийг албан ёсоор бий болгосон. Бид өнөөдөр озон бассейн дээрээ төвлөрч хичээлээ явуулж байна. Озон бассейн гэдэг нь 24 цагийн эргэлттэйгээр озоноор усаа цэвэршүүлдэг гэсэн үг. Бусад жирийн бассейнууд хлораминаар голдуу усаа цэвэршүүлдэг. Хлорамин арьсыг хуурайшуулах, харшил өгөх зэргээр сөргөөр нөлөөлөх талтай байдаг. Харин озоны хувьд хлораминаас гурван мянга дахин илүү усыг цэвэршүүлж, ариутгадаг гэж үздэг. Хүчилтөрөгчөөр баяжуулсан, эмчилгээний зориулалттай ус гэсэн үг л дээ. -Усан бассейнд хичээллэхэд заавал сэлдэг байх шаардлагатай юу? -Манай монголчууд тэр бүр устай ойр байдаггүй хүмүүс шүү дээ. Тийм учраас уснаас айдаг хүмүүс ер нь манайхыг зүглэх бодолгүй юм шиг сэтгэгдэл анх төрдөг байсан. Энэ ойлголт одоо бол өөрчлөгдсөн л дөө. Ер нь бол аква фитнест явахад заавал усанд сэлдэг байх шаардлагагүй. Усан бассейнд босоо зогсоод толгой хэсэг усанд орохгүйгээр дасгал хийдэг учраас уснаас айж эмээх хэрэггүй гэж хэлмээр байна. Манайх мөн сэлэлтийн сургалт явуулдаг. Сэлэлтийн бассейн маань том биш, дундаж хэмжээтэй. Тиймээс сэлж сурахад илүү хялбар дөхөм. Мөн хажуудаа хуурай, нойтон саун ажиллуулдаг. Сауны ач холбогдлыг хүмүүс надаар хэлүүлэлтгүй мэдэж байгаа байх. Хүний биеийн илүүдэл бодис хөлсөөр ялгарч гарч байх ёстой. Үүнд хуурай саун ач тусаа өгдөг. Манайд хичээллэж байгаа хүмүүс долоо хоногтоо 1-2 удаа хуурай саунд орох хэрэгтэй. Уурын сауны хувьд хуурай арьстай хүмүүст илүү тохиромжтой, арьсыг чийгшүүлж өгдөг давуу талтай. Бид бас хажуугаар нь зөв хооллолтын зөвлөгөө өгч, дасгал хөдөлгөөн хийсний үр дүнг тогтмол хянана. Тэгээд эцэст нь "Монголын үнэн" сонины уншигчдад хандаж манай төвөөр үйлчлүүлээрэй гэж хэлмээр байна. Манай төв хотын түргэн тусламж 103-ын зүүн талд байх озон бассейндаа Та бүхнийг урьж байна. Бидэнтэй 99099789, 331014 дугаарын утсаар холбогдож болно. Усны гайхамшигт чанар бол үнэхээр зүйрлэшгүй шүү. Т.ҮЛЭМЖ

Б.Уянга: Усны хувцас бол секс имиж биш

Ярилцлага: "Ням гариг"

"Акуа фитнесс"-ын Ука буюу Б.Уянгын гэрт зочиллоо.

-Гэрийнхэн тань эзгүй байгаа юм уу танилцахыг хүссэн юмсан.

-Зуслан дээр байгаа. Би өөртэй чинь уулзана гээд зуслангаасаа эрт ороод ирлээ. Гэрийнхэн бүгд үлдсэн.

-Ямартай ч цаг гаргасанд баярлалаа. Бидэнд ярилцаж болохгүй сэдэв бий юү?

-Миний тухай, надад хамаатай бүхний талаар чөлөөтэй ярилцаж болно. Харин хүний өмнөөс, бусдын тухай ярих дургүй.

-Бусад гэдэгт гэр бүлийн хүн тань багтаж байгаа юу?

-Яг тийм.

-Тэгвэл өссөн гэр бүлийнхээ талаар ярьж болно биз дээ?

-Гурван хүүхэдтэй айлын том нь. Аав инженер, ээж Үндэсний номын санд олон жил ажиллсан. Би таван настайдаа уран гимнастикийн дугуйланд явж, бүжгээр хичээллэх болсон. 1990 онд байх аа, хоёрдугаар ангид байхдаа төв бассейны анхны сурагчийн нэг болсон. Тэр үед цуг хичээллэж байсан хүүхдүүд одоо олон улсын зэрэгтэй мастер багш нар болжээ. Би 4-5 жил бассейнд явсан ч дагнаж хичээллээгүй. Уг нь би СУИС-ийн урлагийн менежментийн анги төгссөн. Гэсэн ч одоо сонирхлынхоо дагуу эрүүл мэнд, гоо сайхны чиглэлээр бизнес эрхэлж байна. Багын хүсэл, сонирхол маань ажил болсон юм байна гэдгийг саяхан бодож суулаа. Өмнө нь энэ талаар ер бодож байгаагүй, ажлаа л хийгээд явдаг байж.

-Тэр үед ус амьдралын тань чухал байрыг эзэлнэ гэж бодоогүй байсан биз?

- Зургаан жилийн өмнө клубээ нээсэн. Тэр үед акуа фитнессийг хүмүүс мэддэггүй байсан. Оюутан байхдаа “Хар ирвэс” клубт багшилж байгаад Японд гэрээгээр ажиллахаар болсон. Тэнд очиход заалны фитнесс, хэрэгсэл дээр ажиллах, бүжгийн багш, усан фитнессийн багш гэсэн сонголт байсан. Харьцангуй үр дүнтэй, олон давуу талтай, шилдэг төрөл нь усан фитнесс байсан болохоор энэ төрлийг сонгож ажилласан. Гэрээгээ дуусгаад Монголд ирээд, клуб нээхээр шийдсэн юм.

-Ямарч бизнес эхлүүлэхэд санхүүгийн асуудал тулгардаг.

-Багагүй мөнгө хэрэгтэй. Гэхдээ би бизнес эхлүүлэхэд өөрийн гэсэн төлөвлөгөө, бэлтгэл, менежментээ боловсруулсан байсан. Фитнесс бол ямарч зааланд хичээллэж болдог, акуа фитнесст 1.4-1.5 метрийн гүнтэй бассейнтай байх ёстой. Харин манайд төв бассейнаас өөр газар олдохгүй гээд хэцүү асуудал байсан. Тэ­гээд л Чингис зочид буудалд клубээ нээж байлаа. Тэр үед багш, нярав, нягтлан, зөвлөгөө өгөх, захирал гээд цэвэрлэгээнээс бусад ажлаа өөрөө хийдэг байсан.

-Сурталчилгаагаа ч бас өөрөө хийгээд ...?

-Өөр хүн сурталчилгаандаа оролцуулна гэж ер бодож байгаагүй. Угаасаа тэр үед акуа фитнессийг мэддэг хүн бараг байгаагүй.

-Усны хувцастай сурталчилгаа их зоригтой алхам байсан шүү, хүмүүс арай өөрөөр хүлээж авсан биз дээ?

-Тачаангуй, задгай гээд. Зарим нь бүр порно гэж ч ярьдаг байсан. Гэхдээ усны хувцас гэдэг эротик имиж биш. Акуа фитнессийг усны хувцаснаас өөр ямар хувцастай сурталчлах байсан гэж. Монголчууд бассейнаас өөр газарт усны хувцас хэрэглэдэггүй болохоор энэ их цочир, сонин санагдсан байх. Усны хувцас, дотуур хувцас өөр шүү дээ. Анх манайд хичээл­лэхээр ирсэн хүмүүс салангид бикини өмсөхгүй гэж дургүйцдэг байсан.

-Тийм дүр төрхтэй байсан нь хүмүүст сонин байсан болохоор одоо ч гэсэн Ука урлагийнхнаас дутахгүй олны анхаарлыг татдаг. Хэнтэй суусан, хаана амьдарч байгаа, хүүдээ хэн гэж нэр өгсөн бэ гээд л янз бүрийн яриа хөвөрсөөр л байдаг?

-Би ажлаа танилцуулах хэрэгтэй байсан, олны анхааралд өртсөн. Төгс хүн гэж байдаг­гүйгээс хойш тэгээд л янз бүрийн яриа гардаг байсан. Анхандаа эмзэглэнэ, уйлна, лав сайхан байгаагүй. Одоо бол дасчихаж дээ. Нэг талаас ийм боловч нөгөө талаас бахархалтай санагддаг юм. Фитнессийн клуб, тэнд ажиллаж байгаа багш олон байхад би ажлаа, өөрийгөө олонд хүргэж чадсан багагүй амжилт.

-Олны анхаарлын төвд байх тийм ч хүсээд баймаар зүйл биш шүү дээ?

-Янз бүрийн мэдээлэл гарахад эхэндээ хэцүү л байдаг байсан. Хүмүүсийн төлөө ажиллаж, өөрсдийг нь гоё сайхан болгоё гэж байхад яагаад ингэж ярьж байгаа юм бол гэж гомддог байсан.

-Өнгөрсөн хавар танай төвийн үйл ажиллагаа хэсэг завсарлахад хүмүүс хулхидууллаа энэ тэр гээд янз бүрээр ярьж байсан?

-Чингис зочид буудлын барилга олон жил болсон учраас сантехникийн асуудал гараад цаашид үйл ажиллагаа явуулах ар­га­гүйд хүрсэн. Тэгээд шинэ байр хайж, за­саж, тохижуулахад хугацаа хэрэгтэй болсон. Нэгэнт хөдөлгөөн хийснийх үйл ажиллагаагаа өргөжүүлье гэж бодоод балет, бүжиг, йогийн анги, гоо сайхан, саунтай болгосон. Цаг зав багатай бүсгүйчүүддээ гоо сайхны асуудлаа нэг дор шийдэхэд нь хэрэгтэй гэж бодсон. Хэдэн сар завсарлахад хүмүүс сурагласан гэхээр акуа фитнесс бүсгүйчүүдэд хэр чухал болсныг харж болно.

-Эмэгтэй хүн бүр хувьдаа гоо сайхан, финтессийн газартай болохыг мөрөөддөг. Харин Ука үүнийг жинхэнэ ажил хэрэг болгож чаджээ?

-Би ажлаараа бахархдаг. Дасгалаа заан­гаа өөртөө анхаарал тавьчихна. Мөн хүмүү­сийн өөрчлөлтийг хараад кайф авна. Үйлч­лүүлэгчдийнхээ цаг завыг хэмнэх гэсэн гоо сайхны цогц үйлчилгээ маань миний ч гэсэн цаг завыг хэмнэдэг.

-Гоо сайхны үйлчилгээндээ долоон хоногт хэдэн удаа ордог вэ?

-Аливаа зүйлийн хэмжээ хэтрэхээрээ сөрөг үр дагавар гардаг. Тэр утгаараа маникюр, педикюр, гоо сайхандаа долоо хоногт нэг удаа орно. Харин бассейнд 4-5 удаа орно. Хаа нэг тийшээ явах үед энэ хэмнэл өөрчлөгддөг ч миний цүнхэнд усны хувцас байнга байдаг. Гадагшаа явах үедээ далайн эрэг рүү нь явах, үгүй бол бассейнд орох гээд л зохицуулна даа. Удаан хугацаагаар усанд орохгүй байх хэцүү байдаг.

-Бүсгүйчүүдийг гоолиг, сайхан бие галбиртай байгаасай гэж санаа тавьдаг хүн. Ингэхэд өөрөө илүүдэл жинтэй байсан уу?

-Багаасаа гимнастик, бүжгээр хичээллэсэн, “Хар ирвэс” клубт багшилж байсан болохоор ер нь форм алдаж байгаагүй. Гэхдээ жирэмсэн байхдаа, төрсний дараа илүүдэл жинтэй болсон. Тэр үед нэг их эмзэглээд бай­даггүй. Санаа зовоод суухын оронд дасгал хийдэг. Төрсний дараа хоёр сар бассейнд орж болдоггүй, тийм болохоор өдөрт гурван цаг йогийн дасгал хийдэг байлаа. Хүмүүс дасгал хийхээр ядардаг бол спортынхон хөдөлгөөнгүй байхаар ядарч, бие хөшдөг. Тийм болохоор хөдөлж, хөлсөө гаргаж байж кайф авдаг.

-Турах хүсэлтэй бүсгүйчүүдэд ямар зөвлөгөө өгөх вэ?

-Хүн бүрийн таргалалт янз бүрийн шалт­гаантай байдаг. Манай клубт явбал сард 4-5 кг жин хасна гэдэг ч хувь хүн бүрийн онцлогоос ихээ­хэн хамаарна. Залуу эмэгтэйчүүд, жирэмс­лэл­тээс тогтсон илүүдэл жинг богино хугацаанд хасаж болдог бол унаган тарга, чанга булчинтай хүмүүс турах нь удаан. Энэ бүхэнд зөв мэдээлэл, зөвлөгөө өгөх гэж уншиж, судлах хэрэгтэй болно. Ер нь гоо сайхан төдийгүй эрүүл мэндийн талаар багагүй мэдлэг, мэдээлэл хуримтлуулсан. Жингээ хасах хүсэлтэй хүн чин хүсэлтэй, шийдэмгий байх хэрэгтэй. Ер нь заавал таргалж байж турах гэж зовохын оронд урьдчилаад арга хэмжээ авчих хэрэгтэй. Зөв хоол, хөдөлгөөн хоёр л хамгийн сайн арга.

-Гоо сайхны цогцолбор ажиллуулж, бүсгүйчүүдийн гоолиг бие галбирын төлөө санаа тавьдаг Ука биеийн жингээ барих гэж хоолоо сойдог болов уу, тусгай дэглэм баримтладаг болов уу гэдэг нь сонирхолтой?

- Нарийн дэглэм барихгүй. Гэхдээ аль болох хөнгөн, эрүүл хоол сонгодог. Баяр, төрсөн өдөр, найз нартайгаа хооллох гээд хэт их идэх үе байлгүй яах вэ. Тийм үед маргааш нь мацаг барьдаг. Нэг хэсэг их хооллосон байлаа гэхэд дараа долоо хоног нь багасгах ч юм уу, тиймэрхүү байдлаар зохицуулдаг. Тэрнээс биш одоо юм идэхгүй, ийм юм идэхгүй, тэр ч болохгүй гэсэн тогтсон дэглэм байхгүй. Хэмжээг нь хэтрүүлэхгүй л бол торт, шоколад, мөхөөлдөс гээд дуртай зүйлээ идэж болно.

-Нэг хэсэг эзгүй байсан, аяллын чиглэлээ аль зүгт хандуулсан. Зун яаж амрав?

-Гэрийнхэнтэйгээ Сингарпурын Сентоза арал дээр амраад ирсэн.

-Ер нь голын усанд ордог уу. Энэ зун “River вeach” арга хэмжээнд оролдцсон уу?

-Найз нартайгаа 2-3 партид очсон. Сэрүүхэн байсан шүү.

-“Гурван охин” хамтлагийнхан, Нара, Соко гээд л үе тэнгийн урлагийнхантайгаа найзалдаг байх аа?

-Уран бүтээлч, бизнесмэн гээд олон найзтай. Нэг цуглахаар 20-иод хүн ирдэг. Бид сардаа 2-3 удаа уулзана. Гоо сайханд орж, саунд сууна. Дэлгүүр хэснэ, нэгнийдээ очно, бүжигэнд явна гээд залуу хүмүүс уулзахаараа юу хийдэг билээ, тэр бүхнийг л хийнэ.

-Нээрэн “Гурван охин” хамтлагийн уран бүтээлийг ивээн тэтгэсэн гэж байсан?

-“Чихэнд минь шивнээч” гээд гоё дуу байсан. Найз нарынхаа уран бүтээлийг дэмжихээс гадна миний ажилд ч хэрэгтэй байсан учир тэр дууны клипийг хийхэд ивээн тэтгэсэн.

-Нууц биш бол хэчнээн төгрөгийн зардал гарсан бэ?

-5000 доллар. Би мөнгөтэйдөө ч тэр клипийг ивээн тэтгэсэн гэж туйлширч ойлгож болохгүй. Найз нарынхаа уран бүтээлийг дэмжихээс гадна миний бизнест хэрэгтэй байсан учир хамтран ажилласан.

-Укагийн хувьд мөнгө гэж?

-Би хадгалаад, хураагаад бай­даг хүн биш. Олно, олсноо хэрэглэнэ. Гэхдээ бизнесийн зорилго байгаа, тий­мээс хэзээ, юунд, яаж зарцуулах вэ гэдэг дээр төлөв­лөгөөтэй байлгүй яах вэ.

-Одоо байгаа бүхэн тань тэмцэж олж авсан амжилт уу, эсвэл хувь тавилангийн бэлэг байв уу?

-Эзэн хичээвэл заяа хичээнэ гэдэг дээ. Хүсэл сонирхол байсан, сайхан боломжууд тохиож би тэрийг ашиглаж чадсан. Ингээд бодохоор хүүхдийн хүсэл сонирхолыг дэмжих хэрэгтэй. Олон зүйлд сорих хэрэгтэй. Тэр дундаасаа хэрэгтэй, сайн чадах, сонирхолтой зүйлээ олно. Тэр нь ирээдүйд амжилт олоход нь их нөлөөлнө.

-Хүүхдүүдээ ингэж хүмүүжүүлж байна уу?

-Том охин маань миний багатай төстэй. Урлаг, спортод дуртай. Янз бүрийн бүжгийн тэмцээнд орно. Бас fashion чиглэлээр нэлээд сонирхолтой байх шиг. Янз бүрийн загвар зохионо, хүүхэлдэйдээ хувцас оёно. Тэр үед нь ойр зуурын юм авч өгөх байдлаар дэмжиж байна. Одооны хүүхдүүд эрт биеэ даадаг болж. Надаар заалгаж, зааварлуулахаас өмнө бараг л надад заадаг юм. Компьютер, интернэтийн тал дээр би охиноосоо туслалцаа авдаг. Харин бага маань ой гарантай, одоохондоо тийм ийм гэж хэлэх болоогүй л байна. Хүүхдүүд маань усанд байх дуртай. Өсөлт хурдан, чийрэг байдаг болов уу гэж боддог юм.

-Намуухан дуутай, зөөлөн, тайван бүсгүй харагддаг. Харин үүний цаана хичээнгүй, шаргуу, зоригтой эмэгтэй байдаг бололтой?

-Зорьсон зүйлдээ хүрэхийг хичээдэг. Түүнээс биш хорон, ууртай, атаач биш. Хүрэх газартаа очих гэж бүхнээ дайчилна. Гэхдээ тэнд хүрэх ёстой гээд ядарч унатлаа зүтгээд байдаг махруу хүн биш. Миний хийж байгаа ажил хамгийн гол нь дур сонирхол байсан. Би ажлаасаа сэтгэл ханамжийг авдаг болохоор юм бүхэн нь сайхан санагддаг.

-Хөгшрөлтөөс хэр айдаг вэ?

-Айгаад суухын оронд аль болох удаашруулах арга хайдаг. Үнэтэй, чанартай, ховор гоо сайхны бүтээгдэхүүн гэхээс илүү сайн амарч, стрессгүй, өөдрөг бодолтой байвал хамгийн сайн эм болно. Эерэг нөлөөлдөг байх. Хүний дотоод сэтгэл гадаад гоо үзэмжид их нөлөөлдөг шүү дээ.

-Эмэгтэй хүн хүүхэд, гэр бүл, ажил гээд бусдын төлөө ихэнх цагаа зориулдаг. Өөрийгөө яаж баярлуулдаг вэ?

- Дэлгүүр явна, таалагдсан зүйл үнэтэй байсан ч “Их ажилласан юм чинь” гэж өөрийгөө урамшуулаад авчихдаг юм. Залуу насандаа л гоёхоос биш хөгширсөн хойноо гоёод хайчих вэ дээ. Бас номын дэлгүүр орно. Эрүүл мэнд, гоо сайхан, эмэгтэйчүүдийн сэтгүүл, түүхэн ном, бясалгалын ном, дасгалын DVD цуглуулдаг. Сүүлд “Чонон сүлд”-ийг уншсан, “Монголын их хатад” гэдэг ном авсан ч уншиж амжаагүй л байна. Сардаа нэг удаа номын сангаа баяжуулдаг юм. Гэхдээ миний уншдаг ном бясалгал, эрүүл мэнд, түүхэн, сонгодог гэсэн сэдвийн хувьд хязгаарлагдмал. Адал явдал, зөгнөлт, аймшгийн гээд бусад төрлийн зохиолд дургүй.

-Гоо сайхан, имиж дүрх төрхийн хувьд яах аргагүй олны анхаарлыг татдаг. Энэ тал дээр мэргэжлийн хүмүүстэй хамтарч ажилладаг уу?

-Энгийн үед нүүрээ өөрөө будчихна. Харин зураг авалттай үедээ MPHS салоны Отгоогоор нүүрээ будуулж, тэдний үсчин Золоогоор үсээ засуулна. Бас “Матрикс” салоны байнгын үйлчлүүлэгч.

-Үснийхээ засалтыг хэр их өөрчилдөг вэ?

-Энэ тал дээр харин зоригтой өөрчлөлт хийдэг шүү. Саяхан цэнхэр сортой байж байгаад будуулсан. Дараа нь үс жаахан муухай болчихдог юм байна.

-Тэгвэл дуртай үнэртэн?

-Үнэртэй уснаас илүү биеийн лосьон хэрэглэдэг. “Victorias Secret”, “Dior”, “Channel”-ийн биеийн арьс арчилгааны бүтээгдэхүүн.

-Байнга цүнхэлж явдаг гоо сайхны бүтээгдэхүүн бий юү?

-Биеийн тос, лосьон.

-Усны хувцастай олон зургийг тань харсан. Хувцасны шүүгээндээ хэр олон бикинитэй вэ?

-Тэгэлгүй яахав, ихэнх усны хувцас маань ажил дээр байгаа. Энгийн үед голдуу даашинз өмсөнө. Бариу, зөөлөн, суналттай материалтайг сонгодог. Шаргал, цайвар шаргал, ягаан, хар өнгийнх байдаг юм, харин улаан хувцас бараг байхгүй дээ.

-Гутлын хувьд?

-Өндөр өсгийтөд дуртай.

-Хэдэн онд жолооч болж байсан бэ?

-2000 онд жолооч болсон. Спорт загварын машинд дуртай ч одоо “Infiniti” барьдаг.

-Машин гэдэг бүсгүйчүүдийн хоёр дахь гэр болдог. Таны хувьд?

-Би ер нь гоёж, гангалах сонирхолгүй юм шиг байгаа юм. Ээмэг зүүлт, гэр орон, машин тэргээ гоёж гангалаад байдаггүй. Машин дотор маань “No smoking” гэсэн үнэртүүлэгч, нүдний шилнүүд, цэвэр ус, хэдэн цомог л байгаа даа.

Б.Уянга: "Сексийн амьдрал минь гэнэтийн бэлгээр дүүрэн байдаг"

Сайт маань урлаг соёлын одод, олны танил хүмүүсийн сонирхолтой ярилцлагыг та бүхэндээ хүргэсээр байгаа билээ. Дөнгөж нэрд гарч, олонд танигдаж эхлэх үедээ тэд хэрхэн ярьж, өөрсдийнхөө талаар тодорхойлж байсныг эдгээр ярилцлага таны өмнө дэлгэх болно. Энэ удаа бид “Aqua fitness” төвийн захирал Б.Уянгатай хийсэн ярилцлагыг хүргэе. Царайлаг, шавилхан бүсгүй анх “Хар ирвэс” клубын фитнессийн багшаар ажиллаж байсан бөгөөд “С1” телевизийн “Өдөн дэр” үдшийн хөтөлбөрийг ч хөтөлж явсан билээ.

-Өөрийг чинь “Aqua fitness”-ийн багш, “С1” телевизийн “Өдөн дэр” нэвтрүүлгийн хөтлөгч гэдгээр нь хүмүүс илүүтэй мэддэг болов уу. Хэдийнээс эхэлж фитнесстэй амьдралаа холбосон бэ?

-Би бүр таван настайдаа спортын гимнастикаар хичээллэдэг байсан. Дунд сургуулийн сурагч байхдаа ч гимнастик, бүжиг, усан спортоо орхиогүй. 2000 оноос хойш фитнессийн багшаар ажиллаж, монголд анх удаа акуа фитнессийн хичээлийг эхлүүллээ.  

-Фитнессийн багш маань “Өдөн дэр”-ийн хөтлөгч болсон нь сонирхолтой л юм?

-“С1” телевизийн “Эмэгтэйчүүдийн цаг” нэвтрүүлэгтэй хамтарч ажиллан, акуа фитнессийн хичээлээ цувралаар гаргадаг. Тиймээс тус телевизийн зүгээс нэвтрүүлэг хөтлөх санал тавьсан тул “Өдөн дэр”-ээр овоглож эхэлсэн.

-“Өдөн дэр”-ийн шинэ өнгө төрхийг харуулсан сурталчилгаа хэтэрхий эротик ч гэмээр шинжтэй болсон байна лээ. Яагаад тэр вэ?

-“Өдөн дэр” нэвтрүүлэг хайр дурлал, хосуудын нандин харилцаа болсон сексийн тухай, охид залууст энэ талын зөвлөгөө өгөх зорилготой. Амралтын үдэш насанд хүрэгчдэд зориулсан болохоор бусад телевизийн нэвтрүүлгээс илүү нээлттэй байж чаддаг болов уу. Миний хувьд хөтлөгчөөр ажиллаж, редакторын бэлтгэж өгсөн мэдээллийг сонирхуулдаг юм.

-Мэдээж хэрэг, сексийн тухай мэдээлэл хүргэдэг нэвтрүүлэгтээ тохируулж стиль имиж дээрээ анхаарал тавьдаг байх?

-Үгүй ээ, нэвтрүүлгийнхээ өнгө аяст тохируулах гэж хичээдэггүй. Байгаа байдал минь л энэ. Магадгүй гадаад үзэмж минь таалагдсан учраас хөтлөгчөөр сонгосон биз. Түүнээс биш, надад өөрийгөө нэг их айхтар өөрчлөөд байх шаардлага гардаггүй.

-Фитнесс болон нэвтрүүлгээрээ дамжуулаад тодорхой хэмжээнд олны танил болсон байх. Эрчүүдийн зүгээс ойртож дотносох ч гэдэг юм уу ямар нэгэн санал ирдэг үү?

-Янз бүрийн мессеж ирдэг л дээ. “Нэвтрүүлэг чинь таалагдаж байна” гэх мэт. Гэхдээ тэр бүрт ямар нэгэн хариу бичиж, харилцаад байдаггүй. Юу ч гэмээр юм бэ дээ.(инээв)

-Сайхан бүсгүйчүүдийг мөнгөтэй эрчүүдтэй нэр холбох нь их. Үнэхээр иймэрхүү санал ирдэг учраас тэгж ярьдаг юм болов уу, аль эсвэл..?

-Надад лав ирж байгаагүй юм байна. Тэгээд ч би нөхөртэй шүү дээ, удахгүй хуримаа хийх гэж байгаа. Тийм болохоор энэ тал дээр нэг их анхаарал хандуулж, ач холбогдол өгөх дургүй.

-Үдшийн хөтөлбөрийн хөтлөгч, хувь хүнийхээ үүднээс хайр сэтгэл, сексийн талаар ямархуу бодолтой байдаг вэ?

-Нөхөр маань миний анхны хайр. 15 настай байхаасаа үерхэж, багагүй хугацааг хамтдаа үдлээ. Энэ ч утгаараа, анхны хайрыг “Жинхэнэ хайр мөн болов уу” гэж боддог юм. Хайрлаж, дурласан анхны маань хүн миний нөхөр учраас тэр. Сексийн тал дээр ч  нандигнаж явах дуртай. Нөхөртэйгээ жинхэнэ хайр сэтгэлээр холбогдсон болохоор сексийн харилцаа минь хамгийн нандин зүйл. Энэ нандин харилцаагаа үргэлж шинэлэг, хэн хэнийхээ сэтгэлийг татсан сонирхолтой байлгах хэрэгтэй гэж үздэг.

-Шинэлэг, сонирхолтой байлгахын тулд яах ёстой гэж?

-Ямар ч байж болно л доо. Нэг хэвийн биш үргэлж өөр, өөр байлгах. Заримдаа хайртай хүндээ зориулж үдшийг маш таатай өнгөрүүлэх романтик орчныг бүрдүүлэх юм уу гэнэтийн бэлэг барьж болно шүү дээ.

-Тэгвэл та хоёр бие биедээ хэр зэрэг сюрприз барьдаг вэ?

-Нөхөр маань удаан хугацаанд гадаадад амьдарч байгаад ирсэн болохоор амьдрал гэнэтийн бэлгээр дүүрэн байгаа шүү. Нэгэнт ийм дотно харилцаанд орсон хүмүүс сексийг маш сонирхолтой байлгаж чадна.

-“Хайртай бол хартай” гэх зүйр маягийн үг залуусын дунд их дэлгэрч, Энэ тал дээр асуудал үүсдэг үү?

-Урлагийн хүн болоод ч тэр үү, нөхөр маань намайг илүү их ойлгодог. Найз нөхөд, ажил төрөл минь ч гэсэн ойролцоо учраас бие биеэ ойлгож, харилцан итгэж амьдардаг юм.

-Чөлөөт цагаа хаана, яаж өнгөрүүлдэг бол..?

-Найз нөхдийн маань ихэнх нь урлагийн хүмүүс байдаг учраас диско клубт ордог. Бөөнөөрөө цуглаад зусланд гарахад нөхөр маань шорлог хийж өгөх дуртай. Бас бассейнд ихэвчлэн чөлөөт цагаа өнгөрүүлдэг. Урлагийнхантай хамт байхад илүү хөгжилтэй санагддаг учраас дискодох үе бишгүй гарна аа.

-Ажил, амьдрал чинь одоо бүр устай холбоотой болж дээ?

-Тийм шүү.(инээв)Найзууд маань ч гэсэн бассейн, саунд орж амрах дуртай.

-Гэрийн эзэгтэйн хувьд, өөрийгөө хэр үнэлдэг бол?

-Гайгүй ээ. Хурим найр хийж, албан ёсоор гэр бүл болоогүй ч бид хоёр олон жил хамт амьдарсан. Тэгэхээр энэ тал дээр санаа зовох зүйл гардаггүй. Олон төрлийн ногоо холиод шинэ хоолны жор зохиох дуртай. Нөхөр маань ч амттай хоол хийж чадна. Өглөөний хоолыг ихэвчлэн нөхөр маань л бэлтгэдэг шүү. Харин хувцас угаах дуртай хэрнээ индүүднэ гэхээр л миний гар хөдөлдөггүй юм. Түүнээс биш, гэр орноо цэвэр цэгцтэй байлгахад анхаарал хандуулна аа. Эр нөхрийнх нь амжилт эмэгтэй хүнээс шалтгаалдаг гэдэг шүү дээ. Гэр орон, үр хүүхэд, хань нөхөртөө тавих анхаарал халамжаа аль болох зохицуулж, ажил төрлөө амжуулахыг хичээдэг.

-Хуримын тухайд, нууцхан бодол тээж явдаг байх. Энэ бүхнээсээ сонирхуулаач?

-Сонгодог маягаар хийвэл надад илүү ойр байх. Гэхдээ одоохондоо яаж хийхээ төлөвлөөгүй л дээ.  

-Нууц амраг гээд л их ярьдаг. Таны хувьд?

-Дутагдаад байгаа зүйлээ өөр хүнээс хайснаас болж үүсэх асуудал. Бие биеэ хайрлаж чадахгүй бол өөр хэн нэгний хайранд татагдах, эсвэл бусад хэрэгцээтэй зүйлээс болж нууц амрагтай болдог байх. Тэгэхээр хайртай хүнээ нууц амрагтай болгохгүйн тулд бүхнээ зориулж чаддаг байвал зүгээр юм болов уу. Харин өнгө, мөнгөнд татагдан нууц амрагийн асуудалд орооцолдож байгаа хүмүүсийг ер ойлгохгүй юм. Хайрттайгаа учраагүй, жинхэнэ амтыг нь мэдрээгүй болохоор л ийм хөнгөн ханддаг байх. Хайр дурлал ямар ч хүнийг өөрчилдөг шүү дээ. Аймаар шоучин, хүүхэмсэг залуу байлаа ч хайр сэтгэлээ олчихоод зөвхөн түүнийхээ төлөө амьдарсан жишээ олон бий. Амьдралын утга учир нь хайр гэдгийг мэдрээгүй хүмүүс л аливаад замбараагүй, хөнгөмсөг байдлаар хандаж яваа байх. Хайраа хайрлаж, үргэлж арчилж тордож явахгүй бол амархан унтарна. Нэгэнт унтарсан хайрыг  дахиж сэргээх хэцүү шүү дээ. Үүнээс болж өөр хайр үүсэх ч тохиолдол байдаг биз. Анхны хайраа удаан хугацаанд үнэн цэнэтэй байлгаж чадвал жинхэнэ утга учраа олно. Тиймээс охид залуус маань анхны хайраа хадгалж, амьдраасай гэж хүсдэг юм. Амьдралд бага зэрэг үл ойлголцол, маргаан гарах нь мэдээж. Хүнийг хайрлаж байж л өөрөө хайрлуулах учраас энэ мэт зөрчлийг эмэгтэй хүн уучилж, хүлээцтэй хандаж байх хэрэгтэй. Энэ бүхнийг хүлээн зөвшөөрч, хайрлахгүй орхиод байвал салахад хүрч мэднэ.

-Тэгвэл чи хэр хүлээцтэй ханддаг вэ?

-Юу ч мэдэхгүй, жаахан охин байсан болоод ч тэр үү. Анхандаа бага зэрэг ойлголцохгүй, өөрийнхөөрөө зөрүүдлэх үе байсан. Харин одоо аливаад хүлээцтэй хандаж ойлгохыг хичээдэг, уучилж чаддаг болсон.

-Таныг урьд нь гадаадад загвар өмсч байсан гэлцдэг. Үнэн үү?

-Загвар өмсч байгаагүй л дээ. Яахав, фото маягийн сурталчилгаанд тоглож байсан нь үнэн. Би спорт загварын хувцас өмсөх дуртай. Гэхдээ гоё даашинз өмсвөл илүү эмэгтэйлиг, дур булаам харагддаг. Эмэгтэй хүний хувьд, бие галбираараа бахархах хэрэгтэй. Ялангуяа залуу насандаа өөрийгөө төгс сайхан авч явахгүй бол бахархах зүйл үлдэнэ гэж үү.

-Гоо сайхныг хэн дуртай нь авч чадахгүй гэдэг. Гэхдээ сүүлийн үед мэс ажилбарын ачаар энэ асуудлыг хялбархан шийдэх болж?

-Бүсгүй хүн гоо сайхныхаа төлөө хэрэгтэй гэсэн бүхнээ хийх ёстой. Бие галбирийн зохицол, эрүүл мэнддээ сайтар анхаарч чадвал болохгүй гэх газаргүй.

-Харин таныг хөхөндөөсиликон шахуулсан гэлцэх юм билээ?

-Багаасаа спортоор хичээллэж ирсэн болохоор бие галбираа зөв хөгжүүлэх тал дээр илүү ажилласан. Бие галбир минь булчинлаг талаасаа илүү их хөгжсөн. Тэгэхээр аль нэг хэсэгт нь засвар хийлгээд байх шаардлага гараагүй. Энэ бүхэн маань төрөлхийн гоо сайхан.

-Хүүхэд төрүүлсний дараа бие галбираа хадгалж үлдэнэ гэдэг ихэнх хүүхнүүдийн хувьд, хүндрэлтэй асуудлын нэг. Охин тань одоо хэдэн настай вэ?

-Одоо есөн настай. Аавыгаа дуурайсан урлагийн мэдрэмжтэй, усан спортод сонирхолтой хүүхэд бий. Би төрөөд найман сарын дараа фитнессээр хичээллэсэн. Зөв дасгал хийвэл хөх, бэлхүүс сайхан хэлбэртэй болдог юм. Охиноо дүүтэй болгох талаар бодсон зүйл байгаа. Ойрын хугацаанд дахин хүүхэдтэй болохыг хүсч сууна.

-Хоолойны тань өнгө их намуухан болохоор зарим хүн “Ялдам, янаг хоолойтой” гэлцэх нь ч бий?

-Ээж аавдаа хамгийн их эрхэлдэг охин байсан болохоор тэр биз. Би тэгж албаар хичээж ярьдаггүй. Үнэхээр хичээж ярьдаг байсан бол, үргэлж намуухан дуугарч чадахгүй шүү дээ. Төрөлхийн л ийм хоолойтой. Тэгээд ч би огцом уурлаж, орилж чарлах нь битгий хэл чанга дуугарч чаддаггүй. “Өдөн дэр”-ийг хөтлөгч болоход хоолойны минь өнгө илүү түлхэц болсон байх гэж боддог. Хүмүүс их хэлдэг л дээ. “Гоё хоолойтой, намуухан дуутай” гэж. Найзуудын маань дунд чанга дуутай хүн цөөнгүй бий. Зарим үед гэнэт аймаар чанга ярихаар нь их цочно оо. Ер нь эмэгтэй хүн зөөлөн, намуухан дуу хоолойтой байсан нь дээр.

-Бухимдахаараа яадаг вэ?

-Найзууддаа ярьж, стрессээ тайлдаг. Заримдаа бүр уйлна гээч. Хүнтэй зоригтойхон шиг  хэрэлдэж чаддаггүй л дээ, дандаа ялагдана. Сэтгэл дотроо хэрэлдээд байна уу гэхээс биш, ил гаргаад хэлчихэж чадахгүй. Нүүрэн дээр нь шууд хэлчихдэг хүмүүс байдаг шүү дээ. Тиймэрхүү зүйл хэрэг болбол нүүрэмгий найзуудаа урдаа барьчихна. “Ингэсэн, тэгсэн” гэж гомдоллож байгаад л явуулчихна даа.

-Бодсон, санасанаа ил гаргаад хэлчихэж чадахгүй гэхээд бухимдлаа дотроо хадгалдаг байх нь. Гомдомхой хүний зан даа?

-Өө, аймаар гомдомхой. Гэхдээ гомдлоо гээд сүйд болдоггүй юм аа. Хайрын сэдэвтэй кино үзэх юм уу, дуу сонсохоороо уйлчихдаг. Их өрөвч хүн.

-Фитнесс, нэвтрүүлэг, сурталчилгаа гээд санхүүгийн тал дээр бүрэн биеэ дааж чадсан уу?

-Чадсан шүү. Санхүүгийн тал дээр нөхрийнхөө гарыг хардаггүй. Өөрийнхөө ажлаар маш их бахархдаг. Хүмүүс ажлаа тараад фитнессээр хичээллэдэг бол, би ажлаа хийнгээ эрүүл мэнддээ анхаарч байна. Харин багадаа нэвтрүүлэгч болохыг хүсдэг байсан ч хоолой минь тохироогүй. Гэхдээ нэвтрүүлэг хөтлөх болсондоо сэтгэл хангалуун байгаа.

-Фитнессийн зэрэгцээ ямар мэргэжил эзэмшсэн бэ?

-СУИС-ийн урлагийн менежмент, Удирдлагын академийн бизнесийн менежмент чиглэлээр суралцаж төгссөн. “Angels” нэртэй охидын бүжгийн хамтлагтай болсон. Чөлөөт цаг, гоо сайхандаа анхаарах боломж бүрдүүлэхийн тулд бүжгийн клуб нээх бодолтой байгаа. Заавал мэргэжлийн бүжигчин байх албагүй шүү дээ, бид.

Эх сурвалж: Р.МӨНГӨН   www.secret.mn