Д.Одбаяр: Д.Дондогийн асуудлыг халдашгүй байдлын дэд хороонд шилжүүллээ

УИХ-ын гишүүн, Хууль зүйн байнгын хорооны дарга Д.Одбаяраас Д.Дондог гишүүний бүрэн эрхийг түдгэлзүүлэх санал ирсэн тухай болон бусад асуудлаар цөөн асуултад хариулт авлаа.

-УИХ-ын гишүүн Д. Дондогийн бүрэн эрхийг түдгэлзүүлэх санал гурав дахь удаагаа ирээд байна. Энэ удаа ямар хариулт өгөх вэ?

-УИХ-ын гишүүн Д.Дондогийн бүрэн эрхийг түдгэлзүүлэх тухай санал Монгол Улсын Ерөнхий прокуророос УИХ-д гурав дахь удаагаа ирээд байна. Энэ санал өчигдөр  долдугаар сарын 18-ны өдөр Хууль зүйн байнгын хороонд шилжиж ирсэн. Хууль зүйн байнгын хороо энэ асуудлыг хуулийн дагуу өнөөдөр долдугаар сарын 19-ний өдөр Халдашгүй байдлын дэд хороо руу шилжүүллээ.

-УИХ-ын гишүүний бүрэн эрхийг түдгэлзүүлэх тал дээр ямар байр суурьтай байна вэ?

-УИХ-ын байр суурь хэвээрээ байгаа. Монгол Улсын Их Хурлын тухай хуулийн 6.9.1-д заасны дагуу тухайн хуульд томъёолсон бичиглэлийг үндэслэж хариу өгнө. Өөрөөр хэлбэл УИХ-ын гишүүнийг гэмт хэрэг үйлдэх явцад нь, эсвэл хэргийн газарт нотлох баримттайгаар баривчилсан нөхцөлд асуудлыг хэлэлцэнэ гэсэн байр суурь хэвээрээ байгаа. Гэсэн хэдий ч Ерөнхий прокуророос ирүүлсэн гурав дахь бичгийг Халдашгүй байдлын дэд хороо руу шилжүүлсэн.

-Энэ асуудалтай холбоотойгоор УИХ-ын ээлжит бус чуулган зарлан хуралдуулж болзошгүй гэсэн шум дэгдэж байна. Ер нь ээлжит бус чуулган зарлах болов уу?

-Ээлжит бус чуулганы талаар одоогоор УИХ-ын даргын дэргэдэх зөвлөлийн хурлаар яригдаагүй байна. Тэгэхээр УИХ-ын чуулган ээлжит бусаар хуралдах эсэхийг хэлэх боломж алга. Хуулийн дагуу бол ээлжит бус чуулганыг УИХ-ын дарга тогтоол гаргаж, зарлан хуралдуулдаг.

-Авилгатай тэмцэх газар удирдлагагүй удаж байна. Энэ байгууллагын даргын асуудлыг хэрхэн шийдвэрлэх чиглэлээр танай хороонд санал ирсэн үү?

-Энэ нь Хууль зүйн байнгын хороонд шууд хамаарах асуудал биш. Гэхдээ Ерөнхийлөгч Авилгатай тэмцэх газрын даргын нэрийг УИХ-д өргөн барьсан нөхцөлд хуулийн дагуу Хууль зүйн байнгын хороогоор хэлэлцэнэ. Хууль зүйн байнгын хороо орж ирсэн саналыг хэлэлцэхэд бэлэн байна.

-Жолоочийн даатгалын тухай хуулийн хэлэлцүүлэг ямар шатандаа байна вэ?

-Жолоочийн даатгалын тухай хуулийн эцсийн хэлэлцүүлгийг хийсэн. Хаврын чуулганы төгсгөлөөр УИХ-ын чуулганы завсарлага багагүй хугацаанд үргэлжилсэнтэй холбоотойгоор эцсийн хэлэлцүүлгийг нэгдсэн хуралдаанд оруулж чадаагүй. Намрын чуулганы эхээр Жолоочийн даатгалын тухай хууль батлагдах байх гэсэн төсөөлөлтэй байна.

-БНХАУ-тай Ялтан шилжүүлэх гэрээг байгуулах чиглэлээр тохиролцоонд хүрээд байгаа. Гэрээ хэзээ батлагдах бол?

-Хууль эрх зүйн салбарын хүрээнд эрх зүйн туслалцаа харилцан үзүүлэх хамтын ажиллагаа байдаг. Энэ чиглэлээр манай улс БНСУ-тай бүх түвшинд хамтран ажилладаг. Өөрөөр хэлбэл эрүүгийн болон иргэний шугамаар эрх зүйн туслалцаа харилцан үзүүлэх, сэжигтэн болон гэмт этгээдийг харилцан шилжүүлэх, ялтан солилцох чиглэлээр БНСУ-тай хамтарч ажилладаг гэсэн үг. БНХАУ-тай нэлээд олон жилийн хамтын ажиллагааны үр дүнд ялтан шилжүүлэх гэрээг Засгийн газрын түвшинд байгуулсан. Энэ гэрээг Засгийн газраас УИХ-д хараахан ирүүлээгүй байна. ирүүлсэн нөхцөлд үүнийг соёрхон батлах боломжтой.

Эх сурвалж: Зууны мэдээ

2011 оны 7-р сарын 20, Лхагва гариг